KINAPA YASAIDIA MAENDELEO YA WANANCHI WANAOWAZUNGUKA

MIRADI ya Ujirani mwema inayotekelezwa na Hifadhi ya Taifa ya Mlima Kilimanjaro, (KINAPA) kwa kiwango kikubwa imekuwa chachu ya kuwaletea hamasa wananchi wanaoishi kuzunguka mlima kushiriki  kuulinda mlima huo kwa kutunza mazingira yanayozunguka mlima huo.

Mkuu wa Hifadhi ya Kinapa, Etastus Lufungulo anasema kuwa wametumia zaidi ya sh milioni 937 kwa kipindi cha miaka mitano kusaidia  miradi mbalimbali iliyoibuliwa na wananchi wanaoishi maeneo kuzunguka mlima huo mrefu kuliko yote barani Afrika.

Anasema kuwa fedha hizo zilitolewa kuanzia mwaka wa fedha 2007/2008 mpaka mwaka huu wa fedha ambapo Sera ya Ujirani mwema inataka  wananchi husika kupitia vikao vyao vya kijiji kuibua mradi na kuanza kuchangia angalau asilimia 30 ambapo Kinapa huchangia asilimia 70 iliyobaki.

Lufungulo anasema kuwa miradi hiyo imetekelezwa kwenye wilaya za Rombo, Moshi, Siha,  Hai na Longido ambapo miradi mingi ilikuwa kwenye sekta ya elimu ikiwemo ujenzi wa madarasa, nyumba za walimu, mabwalo ya kulia chakula, mabweni, vyumba vya maabara, vyoo na ununuzi wa samani.

Aidha kupitia mpango huo wa ujirani mwema, Kinapa imesaidia uanzishwaji na ukarabati wa miradi wa miradi ya maji, vitalu vya miti ambayo hutumiwa na wananchi kama kitega uchumi kwa kuwapatia kipato kwani miti hiyo huuzwa kwa ajili ya kupandwa kwenye maeneo mbalimbali yanayozunguka mlima huo kwa lengo la kuboresha na kutunza mazingira ya mlima huo unaoliingizia Taifa fedha nyingi za kigeni kutokana na kutembelewa na idadi kubwa ya watalii kila mwaka.

“Tunapiga vita watu kukata miti na majani msituni, hiyo ni agenda yetu kuu kwenye vikao vya Maendeleo ya kijiji, tunahamasisha upandaji miti kwa wingi, kama ambavyo mnaona wenyewe namna watu walivyohamasika kupandanda miti kwenye makazi yao”

“Hapa tumetoa elimu ya mazingira kwa wananchi juu ya umuhimu ya kuulinda na kuutunza mlima wetu, (Kilimanjaro) na imeeleweka ndiyo maana hata katika kutembea kwenu hapa kijijini,  mmeshuhudia namna mazingira yalivyo mazuri kila nyumba watu wamepanda miti ya kutosha”

 KATIBU wa Mradi mradi wa maji wa vijiji vya Ashira na Samanga, Robert  Mushi akitoa maelezo kwa jopo la waandishi wa habari (hawapo pichani) juu ya uteklelezaji wa mradi huo unaofadhiliwa Kinapa nyumba ni tanki la maji.

Hiyo ni kauli ya Mweka Hazina wa Mradi wa Maji wa vijiji vya Shira na Samanga, Amani Shao, unaotekelezwa na wananchi kwa ufadhili wa zaidi ya asilimia 75 wa Kinapa kupitia mpango wake wa Ujirani Mwema.

Anasema kuwa mabadiliko ya fikra za wakazi wa maeneo hayo hasa kuhusiana na suala zima la utunzaji mazingira umechangiwa na elimu ya mazingira waliyoipata lakini kikubwa zaidi ni namna wanavyonufaika na mapato ya mlima Kilimanjaro kwa kusaidiwa kutekeleza miradi  kwenye maeneo yao.

“Unajua kwenye ujenzi wa mradi huu wa maji awamu ya kwanza tuliifanya wenyewe mpaka kukamilika ambapo ilituchukua muda mrefu kwani ilikuwa inatulazimu kuchangishana sisi wenyewe”.

“Lakini ilipofika awamu ya pili Kinapa walijitokeza kutuunga mkono na kutusaidia fedha kiasi zaidi ya sh milioni 36.6 kwa ajili ya ununuzi wa vifaa jambo lililosaidia mradi huu kwenda kwa kasi zaidi na wananchi kupata unafuu mkubwa,” anasema Shao.

Anasema kuwa pia wananchi wanachangia nguvu kazi kwa kuchimba mitaro inayotumika kulaza mabomba hayo kwa ajili ya kupeleka maji kwa nyumba za wanavijijii.

Afisa Mtendaji wa kijiji cha Ashira, Vicky Lyimo  anasema kuwa mwaka jana pekee wamefanikiwa kupanda miti 4,000 kwenye eneo la nusu maili la msitu wa mlima Kilimanjaro ambapo mwaka huu wanatazamia kupanda idadi hiyohiyo ya miti au itaongezeka kidogo.

Akifafanua suala hilo  mweka hazina wa mradi huo wa maji , Shao anasema kuwa idadi hiyo ya miti  haihusishi ile inayopandwa na wananchi kwenye maeneo wanayoishi.

Anasema kuwa wananchi wengi kwa sasa wanajitahidi kujiepusha na matumizi makubwa ya kuni kwa ajili kupikia ambapo wengi wanatumia majiko banifu ambayo hayatumii nishati kubwa ya kuni au mkaa kwa ajili ya mapishi ya vyuakula majumbani.

Kwenye mradi huo mbali na Kinapa kupitia mpango wake wa ujirani mwema kuchangia kiasi hicho cha fedha kwa ajili ya utekelezaji wa awamu ya pili ya mradi huo kwa kujenga kisima chenye uwezo wa kuhifadhi maji yenye lita za ujazo 150,000 wananchi nao wanachangia nguvu kazi inayokadiriwa kuwa sawa na zaidi ya sh milioni 14.4 .

Mradi huo ukikamilika unatarajia kuwanufaisha wananchi zaidi ya 1,500 wa vijiji hivyo viwili kwa kuwapatia maji safi na salama yatakayofika kwenye maeneo yao kupitia mabomba.

Katibu wa Mradi huo, Robert Mushi anasema kuwa mradi huo ulianza 2004 kwa wananchi kuchangishana ambapo waliweza kutengeneza eneo la kuchukulia maji (intake) ambapo kutokana na uwezo  mdogo wa kifedha waliokuwa nao hatua hiyo ilichukua muda mrefu mapka kukamilika.

Anasema kuwa mwaka 2011 wakiwa kwenye awamu ya pili ya ujenzi huo ndipo Kinapa walianza kuwawezesha jambo lililoongeza kasi ya mradi huo kwani waliweza kujenga kisima hicho ambacho kimeshakamilika ndipo wakaanza awamu ya tatu ya kusambaza mambomba kwa ajili ya kupeleka maji kwenye nyumba za wanavijiji wa Ashira na Samnaga.

“KINAPA wametupa vifaa vya ujenzi kwa awamu ya tatu ya ujenzi ikiwemo mabomba yenye urefu wa mita 1,500, hii kazi ya kusambaza mabomba tulitarajia ingekuwa imekamilika desemba mwaka huu lakini  tunakwamishwa na mawe ya pale karibu na shule ya sekondari Ashira, kuna mawe mengi sana” anasema Mushi.

Anasema kuwa wanafanya kazi ya kung’oa mabomba yaliyowekwa mwaka 1970 na  Halmashauri ya Wilaya ya Moshi wa ambayo kwa sasa hayakidhi haja kutokana na ongezeko kubwa la watu na mabomba hayo yamechakaa kutokana na kutumika kwa muda mrefu.

“Unajua tuliamua kuanza mradi huu baada ya maji kuwa kidogo, yakawa hayatoshelezi. Ilikuwa inalazimu tuyatumie kwa mgao hivyo mwaka 2003 tukaanza kuchangishana na kuanza ujenzi wa tanki lakuhifadhia maji  mwaka 2005 ambalo lilikamilika mwaka 2011” anasisitiza katibu huyo wa mradi.

Tanzania Daima  pia ilifanikiwa kutembelea mradi wa ujenzi wa bwalo la kulia chakula wanafunzi wa shule ya sekondari ya Olele iliyoko wilayani Rombo unaofadhiliwa na Kinapa kupitia program yake ya ujirani mwema.

Bweni hilo lenye uwezo wa kutumiwa na 120 kwa wakati mmoja limegharimu zaidi yash milioni 71 ambapo Kinapa imechangia sh milioni 53 ikiwemo gharama za mafundi na vifaa.

MKUU wa shule ya Sekondari ya Olele, Bertha Hubert akimsikiliza diwani wa kata ya Olele, Michael Mrema, (CCM), wakati akitoa maelezo kwa waandishi wa habari (hawapo pichani) juu ya ujenzi wa bwalo la chakula (linaloonekana nyuma) uliofadhiliwa na Kinapa.

Mwalimu Mkuu wa shule hiyo yenye jumla ya wanafunzi  441, Bertha Hurbert anasema kuwa ujenzi wa bwalo hilo ulianza mwaka novemba 2009 ambapo limekamilika mwanzoni mwa mwaka huu.

Anasema kuwa kwa sasa wanafunzi wanatumia bwalo hilo kwa ajili ya kufanya mitihani ya Taifa ikiwemo ile ya kidato cha pili na nne ingawa baadaye linatarajiwa kutumika pia kwa shughuli za jamii pale litakapohitajika.

Diwani wa kata hiyo ya Olele, Michael Mrema, (CCM) anasema kuwa michango kama hiyo inayotolewa na Kinapa  imekuwa chachu kubwa kwa wananchi kuhamasika kutunza na kulinda mazingira.

“Kwa kweli kwenye kata yetu vijana wamehamasika sana kutunza mazingira, hata moto ukitokea huko kwenye msitu wa mlima Kilimanjaro wao wanajitolea kuuzima bila kutegemea malipo yoyote” anasema Mrema.

Anasema kuwa hiyo imechangiwa na ufadhili unaotolewa na Kinapa kusaidia miradi kama hiyo ya ujenzi wa bweni ambayo wanakijiji walipaswa kuchangishwa ili iweze kutekelezwa jambo ambalo lingewachukua muda mrefu  na wangesukumana hasa kutokana na ugumu wa maisha kwa sasa.

“Hapa wananchi wamehamasika kuhusiana na masuala ya mazingira kiasi kwamba akitokea mtu anafanya uharibifu wowote pengine wa kukata miti wanakijiji wenyewe wanatoa taarifa kwenye ofisi ya kijiji” anasisitiza diwani Mrema.